Posibleng mapagawas na ang warrant of arrest gikan sa International Criminal Court (ICC) karong Septiyembre sumala pa ni retired Supreme Court Justice Antonio Carpio.
Gitumbok sa kanhi mahistrado, nga ang imbestigasyon sa ICC kalabot sa war on drugs sa miaging administrasyong Duterte.
Sa pakighinabi, ang kanhi mahistrado niingon nga sa iyang pagtuo duol na ang adlaw sa pagtutuos tungod kay base sa iyang nadunggan, sunod buwan na usab ipagawas ang warrant of arrest.
Matud pa niini nga niabot na sa importanteng punto ang imbestigasyon sa ICC prosecutor sa brutal nga kampanya batok sa ilegal nga drugas.
Wala maghisgot si Carpio sa iyang mga tinubdan labot sa posibleng pagluwat og warrant of arrest sa ICC.
Kahinumduman, nga una nang gipalutaw ni kanhi Senador Antonio Trillanes IV nga segurado na nga mogawas ang warrant of arrest karong tuiga.
Ang kanhi Senador maoy usa sa mga nipasaka og reklamo sa ICC kalabot sa drug war killings sa nasod ubos sa miaging administrasyon.
