DAVAO CITY – Balhug na karon sa presohan ang usa wanted personality nga gikanayong nanglugos sa iyang kaugalingon nga pagumangkon kaniadtong 2014 human ang gipahigayon nga man hunt operation sa Barangay Golden Valley, Mabini, Compostela Valley. Naila ang suspek nga si Ariel Maignos, 31 anyos, residente sa Barangay Golden Valley.
Gisikop ang nahisgutan pinasikad sa warrant of arrest nga gi-isyu ni Judge Dorothy Montejo-Gonzaga, assisting judge sa Regional Trial Court Branch 3 sa Nabunturan, Compostela Valley. Sumala pa kang Police Brigadier General Marcelo Morales, Police Regional Office-Davao director, nagpahigayon ang tracker team sa Mabini Municipal Police Station kaabag ang Provincial Intelligence Branch (PIB)-Compostela Valley ug operasyon batok sa suspek.
Gikanayong anaa sa ika-unom sa listahan ang dinakpan sa most wanted person sa Enhance Managing Police Operation Municipal Level. Kahinumduman nga kaniadtong May 2014, positibo nga gitudlo ang suspek nga maoy nangmolestiya sa iyang kaugalingon nga pagumangkon.
Samtang gimandoan sab ni Morales ang tanan mga city ug provincial directors sa rehiyon nga pahugtan pa ang police operations batok sa wanted persons isip kabahin sa ilang anti-criminality campaign.
Ang nasikop nga suspek gikustodiya karon sa Mabini Police Station samtang gihulat ang pagtaral sa iyang gi-atubang nga kaso.
