Gimando ni Philippine National Police (PNP) chief Gen. Rommel Francisco Marbil ang mas han-ay nga palisiya sa Police Security and Protection Group (PSPG).
Adunay kalabutan kini sa paghatag ug police escort sa mga indibiduwal o personalidad. Gipahayag sa opisyal nga gikinahanglang prayuridad sa paghatag ug seguridad sa PNP ang mga indibiduwal nga adunay hulga sa kinabuhi o high security threats, aron nga mahimong episyente ang pagpatuman sa serbisyo sa publiko.
Ang mga nag-unang hinungdan sa paghatag ug police security mao ang hulga sa pagpangataki, katungdanan sa gobyerno sa katawhan ug intelligence report nga nagpakita ug timailhan nga adunay potensyal nga hulga sa seguridad sa usa ka indibiduwal.
Samtang gipaneguro usab sa PNP Chief nga magpadayon ang paghatag nila ug seguridad kang Vice President Sara Duterte, bisan paman sa pagbalhin sa 75 ka mga police security sa bise presidente sa uban pang police unit.
Dugang gipahayag sa opisyal, adunay insakto pa gihapong police security ang gihatag kang VP Sara bisan paman nga gikunhuran ang ihap niini.
Subay sa report, gibutang ang 75 nga mga sakop sa kapulisan sa National Capital Region Police Office (NCRPO) samtang adunay 31 ang nagpabilin sa Vice President.
