Nagpadayag og kinasingkasing nga pagpasalamat si Bise Presidente Sara Duterte human gipahayag sa Korte Suprema nga dili konstitusyonal ang ika-upat nga impeachment complaint batok kaniya.
Sa iyang pamahayag, gipasalamatan sa Bise Presidente ang mga miyembro sa iyang Defense Team nga mitindog ug nakigbisog alang sa iyang kaso, bisan pa niadtong panahona nga halos walay gustong mudapig kaniya.
Gidayeg usab niya ang mga Petisyoner sa G.R. No. 278359 tungod sa ilang kaisog sa pagkuwestyon sa giingong pag-abuso sa House of Representatives.
Wala usab niyang kalimti ang mga ginikanan, kabataan, ug mga hilom nga tagasuporta nga nag-ampo alang sa hustisya ug kaangayan.
Matud pa ni Duterte, ang nasud angay lamang nga makatagamtam og tarong ug matinud-anong liderato, ug angay nga magpabiling lig-on batok sa mga lider nga mas gipalabi ang kaugalingong interes kaysa sa kaayohan sa katawhan.
