DAVAO CITY – Gipatuman na sab ang maximum security alang sa mga dagkong pangalan nga mubisita sa dakbayan atol sa Araw ng Davao.
Gikumpirma ni DCPO Spokesperson Police Major Catherine dela Rey nga giandam na sa Davao City Police Office ang mamahimong VIP security nila former president Rodrigo Duterte ug Vice President Sara Duterte atol sa gilaumang pagsalmot sa pagasulog sa ika-86 nga tuig sa Araw ng Dabaw.
Dugang pa sa opisyal, ihatag pud ang susamang VIP security sa mga labing dagko ug importanteng mga bisita nga musaksi sa mga programa atol sa kasuluogan.
Una nang gikumpirma sa kanhi pangulong Duterte ang iyang partisipasyon karong tuig, apan wala pa hinuon tubag sa imbitasyon ang bise presidente.
Sa pikas bahin, nagtumong ang DCPO sa zero incidents atol sa charter day sa dakbayan subay sa marching order DCPO Director Colonel Alberto Lupaz ngadto sa mga personahe sa kapulisan.
Gipaklaro sa kapulisan nga walay gun ban apan mabinantayon gihapon ang DCPO sa mga nanag-iya og armas.
via || Bombo LJF
