Pormal na nga gipirmahan ni Pangulong Ferdinand R. Marcos Jr., ang VAT Digital Services bill nga maghatag ug otoridad sa kagamhanan aron nga mopahamtang ug value added tax sa mga digital services.
Human nga gilagdaan sa Pangulo, hingpit na nga balaod ang VAT on digital services kon House Bill No. 4122. Buot pasabot sumala pa niini, buhisan na ang mga digital services sama sa gihimong pagpahamtang sa mga giisip nga traditional business sama sa restaurants, retail stores ug susamang negosyo.
Sakop sa VAT on digital services ang Netflix, Google , lakip ang market place.
Sa bisa sa himuong pagpatuman sa nasampit nga balaod ang gilauman nga makakuha ang gobyerno niini ug revenue nga mokabat sa P7.25 bilyon sa 2025, samtang anaa sa P21.37 billion sa 2026 ug P22. 81 billion sa 2027 ingon man P24.42 billion pesos sa 2028 samtang 26.27 billion sa 2029.
Kini nga balaod ang gilangkuban sa mga nagkadaiyang serbisyo sama sa mga online search engine, online marketplaces, cloud services, online media ug advertising, online platform ug digital goods.
Giisip nga usa sa mga prayoridad nga lakang sa Administrasyong Marcos, nga tumong sa maong balaod nga mahatagan ug pagtagad ang mga pagkalugi sa kita gumikan sa mga ambiguities nga mipatigbabaw sa balaod mahitungod sa pagbuhis sa mga transaksyon sa e-commerce.
Partikular nga target niini ang mga langyaw nga kumpanya nga wala nakabase sa nasud nga padayong naghatag ug serbisyo sa mga konsumanteng Pilipino.
