DAVAO CITY – Sikop sa gipahigayong manhunt operation ang dugay nang gipangita nga squad leader sa Pulang Bagani Command sa New People’s Army (NPA) nga si Leonilo Gonzales alyas Kumander Banakon.
Naaresto ang maong lider alas 4:30 ang takna sa hapon kagahapong adlawa sa San Roque, New Corella, Davao del Norte pinasikad sa mga Warrant of arrest alang sa mga krimeng gihimo niini nga gilangkuban sa Murder, Attempted Murder, Robbery by a Band, Homicide, Sedition and Multiple Frust Murder nga gipagula sa nagkalain-laing sanga sa RTC 11 ning syudad sa Dabaw.
Dakpan si Gonzales sa gipahigayong manhunt operation sa Davao City Police Office partikular na sa PS7 ug City Mobile Force Company (CMFC) sa pakig-alayon sa New Corella Police Station ug sa 25th Infantry Battalion (25IB), Philippine Army.
Nasayran sab nga nalambigit ang nahisgutan sa serye nga pagpangatake ug pagpanghasi sa tibouk Rehiyon 11 sama sa Burning Incident sa Lapanday niadtong 2017, harassment and abduction sa 5 ka personahe sa PS7 niadtong 2016 ug ang nahitabong pagpangatake sa Panabo Police station nga miresulta sa pagkamatay sa usa ka opisyal sa kapulisan niadtong 2011.
Dugang pa niini, sayran sab nga anaa sa Top 2 sa International Security Operations watchlist – City level ang nasangpit nga kumader.
Gikustodiya na sa Investigation and Detective Management Branch (IDMB), DCPO si Leonilo Gonzales alyas Kumander Banakon alang sa tukma nga disposisyon.
