DAVAO REGION- Nakasinati ug kusog nga mga pagbundak sa ulan ang pipila ka bahin sa Davao Region kagakabii nga miresulta sa kalit nga mga pagbaha nga nakahatod sab ug perwisyo sa katawhan tungod sa Localized Thunder Storm.
Usa sa mga gibahaan ang pipila ka mga residente sa Bria Homes, Magugpo West, Rotary Tagum, Canocotan, ug pipila ka bahin sa Tagum City Davao Del Norte kagabii.
Samtang adunay nahitabo sab nga pagdahili sa yuta ug pagligid sa mga bato sa dalan sa Pulang Pantad, Brgy. Badas, Mati City kung diin usa lamang ka lane ang naagi-an sa maong dalan nga dali sab niining gipahigayon ang road clearing operation.
Samtang dinhi sa dakbayan sa Davao adunay pipila ka bahin ang nabahaan ilabi na ang ubos nga bahin nga mga lugar, adunay punuan sab sa kahoy ang natumba sa Bago Aplaya tungod sa kusog nga hangin atol sa pagbundak sa ulan.
Samtang ang mga dagkong kasapaan ang nagpabilin hinuon nga anaa sa normal nga lebel apan padayon gihapon kining ginamonitor sa hingtungdang ahensya sa syudad.
Apan ang usa ka gamay nga sapa sa Brgy. Gatungan, Bunawan district ang hilabihan kakusog ang nasinatian nga baha kagabii nga hinungdan sa pagkaanod sa biktima nga usa ka inahan nga si Perly Debalucos nga residente sa maong lugar.
Subay sa report, wala na makauli sa balay ang biktima human sa kusog nga pagbundak sa ulan kagabii nga miresulta sa kalit nga pagbaha. Sa karon padayon gihapon nga makasinati ug mga pag-ulan ang dakbayan ug tibuok rehiyon gumikan gihapon sa Localized Thunderstorm.
