DAVAO DEL SUR- Patay ang usa ka 46-anyos nga security guard human kini siyang gidunggab sa ugangan niining mag-uuma niadtong adlawng sabado.
Ang maong biktima ang giilang si Rogelio Rabago Lastimosa, 46-anyos nga residente sa Purok Talisay 3, Brgy. Poblacion, Malalag, Davao del Sur.
Samtang ang suspetsado ang giilang si Jose Juban Lumbag, 64 anyos nga usa ka mag-uuma ug residente usab sa naasoy nga dapit.
Sumala sa report gikan sa Davao Sur Police Provincial Office (DSPPO) nahitabo ang maong insidente sa duol sa gipuy-an sa biktima bandang alas 8:20 sa gabie.
Sumala pa nga nag-inom og ilimnong makahubog ang maong biktima atol sa pag-abot sa suspetsado.
Sa wala masutang rason, kalit lamang matud pa nga giatake sa suspek ang biktima ug gidunggab kini sa makadaghang higayon.
Human sa maong insidente, dali dayung miikyas ang suspetsado samtang ang biktima ang daling gidala ngadto sa Davao Sur Provincial Hospital apan gideklara na kining patay sa attending physician.
Pinaagi usab sa gilusad nga hot pursuit operation, daling nasikop ang miikyas nga suspek ug anaa na kini karon sa kustodiya sa Malalag MPS.
Sa inisyal nga imbestigasyon sa otoridad, personal nga kaligotgot ang ginalantaw karong nga motibo likod sa pagdunggab-patay sa suspek ngadto sa biktima.
Ning kasamtangan ginahan-ay na usab ang posibleng kasong paga-atubangon sa suspetsado.
