Nadasok sa ilalom sa usa ka truck ang usa ka motorista nga nagmaneho og motorsiklo atol sa nahitabong disgrasya pasado alas-3 sa hapon kagahapong adlawa, Hunyo 21, 2025, Panacan, ning dakbayan sa Davao.
Sumala pa sa inisyal nga imbestigasyon, posibleng nawagtangan og kontrol ang rider o nasayop og liko nga misangpot sa iyahang pagkadiretso sa ilawom sa trak.
Gilayong miresponde ang mga personahe sa City Transport and Traffic Management Office (CTTMO) aron matabangan ang biktima ug madala kini sa labing duol nga tambalanan alang sa medikal nga atensyon.
Gipahibalo sa awtoridad nga magpadayon ang imbestigasyon aron masuta ang hinungdan sa maong insidente ug kung adunay kalapasan nga nahimo.
Samtang gipanawagan usab sa mga motorista ang pagbantay ug pag-amping sa dalan aron malikayan ang susamang disgrasya.
