DAVAO CITY – Patay ang pastor kinsa nakapatay usab og tulo ka mga tawo human nangilog og armas sa mga police nga modala unta kaniya sa ospital.
Sa pakighinabi sa Bombo Radyo, gikanayon ni Police Corporal Eric Camus, duty investigator sa Jose Abad Santos Police Station sa Davao Occidental, mireklamo si Pastor Roger Lakina og pagpanakit sa iyang tiyan hinungdan nga gidala kini sa ospital pasado alas 2 kaganinang kaadlawon.
Apan dili pa lamang kaayo layo gikan sa police station mihangyo si Lakina nga mangihi hinungdan nga mihunong ang police car ug gikuhaan kini og posas, apan kalit sumala pang giilog niini ang armas ni patrolman Angeles ug gipusil sa likod nga bahin apan gumikan sa gisul-ob nga bullet proof vest wala makadulot. Usa sa mga police mibalos ug na-igo sa ulo ang pastor nga maoy hinungdan sa iyang kamatayon.
Kahinumduman nga gipangtigbas ni Pastor Lakina ang iyang anak-anak nga si Marimar Muntad, 16-anyos, ug 3 ka bulan nga buntis; Jemar Muntad, 5-anyos ug silingan niini nga si Uliseo Uso mga residente sa Sitio Pakpakan, Purok Narra, Barangay Marabago, Jose Abad Santos, Davao Occidental.
Sumala ni Corporal Camus, nag-wild si Pastor Lakina gumikan kay nagbaton kini og walay pagkasinabtanay tali kang Marina labot sa gipangayo niini nga bugay kun dowry ngadto sa mga ginikanan sa lalaki nga nakabuntis sa iyang anak-anak.
Dugang pa ni Camus nga adunay samad sa dughan si Pastor Lakina sa dihang ilang nadakpan human gihimo ang krimen.
