DAVAO CITY – Nanawagan na lamang ang Overseas Filipino Worker (OFW) nga si Lorina Acedo, lumad nga taga Davao ug nanarbaho karon sa Al-Yarmuk Baghdad, Iraq sa iyang kabanay nga anaa dinhi sa nasod nga dili mabalaka gumikan kay anaa sa maayo ang iyang kahimtang.
Tipik lamang kini human nga gipatuman na karon sa gobyerno sa Pilipinas ang mandatory repatriation sa mga Pinoy workers nga anaa sa mga nasud nga posibleng mapagan sa higayon nga moulbo ang kagubot.
Sumala pa kang Acedo nga kasamtangan, pabilin pa gihapon nga kalmado sa lugar ug gani padayon lamang sila sa ilang normal nga kinabuhi.
Naguol lamang ang nahisgutan gumikan kay wala sumala pa siya’y ideya kung asa ang embahada sa Pilipinas sa Baghdad sanglit misulod siya sa nasud Iraq nga walay igong dokumento.
Sa higayon nga pugson sumala pa ang pagpauli sa mga Pinoy, andam siya nga motamud niini.
Lisud sab sumala pa ang iyang sitwasyon gumikan kay walay landline ang iyang agalon aron magamit unta pag-contact o motawag sa embahada sa pilipinas ugaling adunay emerhensiya.
