DAVAO DEL SUR – Kabsan sa kinabuhi ang usa ka lalaki human nga gitigbas sa iyang kainum niadtong adlawng Lunes, Abril 6, sa Purok 7, Brgy. Pitu, Malalag, Davao del Sur.
Subay sa taho sa Malalag Police Station, giila ang biktima nga si Roel Mamalias Lascuña, 50 anyos, minyo, mag-uuma ug residente sa nasangpit nga dapit. Samtang ang suspetsado nailhan sa pangalang Daryl Palawan Pelayo, 35 anyos, minyo, mag-uuma ug residente sab sa maong dapit.
Sa wala pa ang pang hitabo, nag-inom ang mga nahisgutan kauban ang ilang mga silingan sa sa Farmhouse ni Jessie Antoque Suerte, 38 anyos, nagpuyo sa Purok 3, sa susamang barangay.
Samtang ga-inom, bandang ala una sa kadlawon, gikalit og tigbas sa suspek ang biktima gamit ang sundang ug mi igo kini sa iyang tangkugo.
Nakaikyas pa ang suspetsado samtang gitabang ang biktima sa mga kasilinganan apan nakutluan ang kinabuhi niini.
Nahatud ang patayng lawas sa usa ka punerarya sa Malalag samtang malampusong nasikop sa kapulisan ang suspek human sa hot pursuit operation sa mga kapulisan kagahapon.
Giangkon sa suspek nga daan nga kaligutgut sa biktima ang hinundgan sa pagpanigbas.
Desidido sab ang pamilya nga mupasaka og kaso ang pamilya sa biktima.
via || Bombo Nilo Cobrado and Bombo LJF
