DAVAO CITY – Gumikan sa mas gipahugtan karon nga lakang sa kagamhanan batok mga investment scams sa Davao region, usa na sab ka kompanya ang nagpahibalo sa ilang mga investors nga tapuson na nila ang ilang operasyon o hingpit na nga manirado. Mismong ang kadumalahan sa Perfect Save’n o P7 Marketing ang nagpahibalo nga nakadesisyon ang kompanya nga ihunong na ang ilang operasyon.
Hinuon sumala pa nila ang nahisgutan nga lakang isip pagtamud sa kung unsa man ang kamandoan sa kagamhanan.
Nakiglambigit na matud pa sila karon sa Tagum City Police Office aron nga masikaso ang mga gikinahanglan nga dokumento aron nga hapsay nga mabalik ang salapi ngadto sa ilang mga investors.
Gikanayong nalugi na ang kompanya gukad nga gipahunong kini kaniadtong Hunyo 10 ug nalisdan na matud pa sila nga makabalik sa ilang operasyon gumikan kay nakasinate na sila ug suliran sa panalapi.
Usa sa lakang nga ilang himuon mao ang pagbalik sa kapital sa mga investors ug paningkamutan nila nga mahatag ang X3 alang sa tanan nila nga mga partners.
Gihatagan lamang sila ug 90 ka adlaw aron nga masulbad o mabalik ang salapi sa ilang mga investors.
