DAVAO CITY – Gibatikos sa social media ang kahimtang sa usa ka mga serbidor sa usa ka Chinese fastfood restaurant nga dunay branch ning dakbayan gumikan sa paghatud niini og order mismo sa balay sa iyang kustomer.
Sa usa ka nag-viral nga post sa social media, usa ka service crew nga si alyas Shiela ang sumala pa gipasuroy sa manager aron mangalap og orders sa mga kabalayan.
Sa video, nabalaka ang kustomer sa iyang order nga halo-halo gumikan sa nasayran nga walay gisakyan ang service crew paadto ug pabalik sa gitarbahuan nga fastfood alang sa paghatud sa order.
Gawas niana, kaugalingong kwarta ang gigamit sa maong serbidor ug payong lamang ang iyang dala atol sa paghatod niini og pagkaon.
Sumala pa sa service crew, gamay matud pa ang ilang branch busa nangita kini og paagi aron makaaghat og daghanang kustomer. Hinuon, malampuson nahatud sa service crew ang iyang order ug gihatagan siya og tip sa kustomer.
Apan human sa maong panghitabo, diha na nagpagawas og sentimyento ang nag-order sa maong pagkaon.
Sumala pa, dili maayo ang pagtratar sa maong kumpanya kanila ug gikinahanglang papanubagon sa management ang maong pamaagi.
Nagpagawas na og pamahayag ang maong fastfood chain ug gipasalig niini ang paghunong sa maong kalihukan.
Gi-review na sab sa kumpanya ang maong video ug nagpasalig nga ilang gipasibaw ang ethical standards ingon man ang kaluwasan sa mga empleyado.
via || Bombo LJF
