DAVAO CITY – Nanganti ang buhatan sa Bureau of Internal Revenue (BIR) nga magpadayon ang ilang operasyon batok sa mga establisyemento sa dakbayan nga wala nagdeklara sa ilang ensakto nga kita matag tuig.
Kahinumduman nga hangtud karong sirado pa gihapon ang kan-anan nga Cheat Time Bakehouse nga nahimutang sa Guerrero kanto Ponce St. ning siyudad human ang gipahigayon nga Oplan kandato sa BIR human nga wala gideklara ug tarong sa nahisgutan nga establisyemento ang ilang kita.
Kalakip sab sa gipasirad-an ang usa pa nila ka branch nga nahimutang sa Bangkal ning dakbayan.
Sumala pa kang Atty. Jose Edima Jaen, Revenue District officer sa BIR West, hayan nga mapasakahan sab ug kaso ang nanag-iya sa nahisgutan nga negosyo sa higayon nga dili niini mabayran ang iyang obligasyon sulod sa lima ka adlaw nga lugway.
Nanawagan sab ang opisyal ngadto sa publiko nga mamahimong mo-report sa ilang buhatan sa higayon nga adunay mga establisyemento nga wala nagahatag ug resibo.
Nasayran sab kang Atty. Jaen nga sa kasamtangan, anaa na sa upat ka mga establisyemento sa dakbayan ang ilang napasirad-an gumikan sa mga nahimong kalapasan.
