Padayon pa gihapon nga gipangita ang mga nahanaw nga mga mananagat sa kadagatan sa probinsya sa Davao Oriental.
Sa pagkakaron, malaumon gihapon ang pamilya sa unom ka mga mananagat nga makit-an pang buhi ang mga biktima.
Nasayran nga lima ka adlaw na human sila gikareport nga missing.
Sa pagkakaron, gipahugtan ang search and rescue operations sa Coast Guard District Southern Mindanao (CGDSEM) pinaagi sa Coast Guard Station Davao Oriental alang sa mga biktima nga sakay sa motor banca nga “LIEZL” human gikareport nga nalunod kini niadtong Pebrero 20, 2026 sa kadagatan sa Manay.
Gipagawas sa Coast Guard Station Davao Oriental ang mga ngalan sa mga missing: Iganacio Manuel, 52 anyos, Cristobal Manuel, 27 anyos, Jose Sarajena, 70 anyos, Darwin Mag-aso, 43 anyos, Alejandro Dormal Jr., 48 anyos, Jacinto Pacyao, 56 anyos.
Sa mga adunay impormasyon mahitungod sa ilahang kahimtang, mahimo kining ireport gilayon sa Coast Guard Station Davao Oriental o motawag sa 0966-837-0536.
Samtang sa laing bahin, nagpagawas usab og Notice to All Mariners No. 011-2026 ang Coast Guard Station Davao Oriental kabahin sa giingong pagkawala sa usa ka mananagat gikan sa Mati City.
Sumala sa report, ang missing person giila nga si Nicasio L. Cosare, 70-anyos, residente sa Magsaysay 17-1B, Barangay Central, City of Mati, Davao Oriental.
Ang ulahing kontak kaniya sumala pa sa mga otoridad nga milawig kini niadtong Pebrero 19, 2026, padulong sa kadagatan sa Barangay Cabuaya sakay sa kolor blue ug puti nga motorbanca, nga adunay orange nga outrigger.
