DAVAO CITY – Usa ka 18 anyos nga ulitawo ang anaa sa kritikal nga kahimtang human siya nabangaan sa usa sa mga partisipante sa Ironman 70.3 triathlon bandang alas-9 kagahapon sa buntag, Marso 26, sa Purok Ubas, Brgy. Santo Niño, Panabo City, Davao del Norte.
Giila ang biktima nga si Gerald Tayad, residente sa nasangpit nga lugar. Sigon sa imbestigasyon sa Panabo City Police Station, mitabok si Tayad sa dalan nga gilatas sa mga atleta sa Ironman aron kuhaon lamang ang usa ka sudlanan sa tubig.
Dihang gisugat siya ug gibanggan sa kaatbang nga bisikleta sa usa ka partisipante nga naglawig gikan Tagum City pabalik sa Davao City.
Dali-daling girespondehan sa mga rescue teams ang maong insidente. Nakahiagom og bun-og ug samad ang duha, apan ilabihan ang gidangatan sa ulitawo.
Sumala pa sa social media post sa nagpailang ig-agaw sa biktima, iyang gikanayon nga gikuha lamang ang maong tumbler nga gilabay sa usa ka siklista aron makalikay sa aksidente ang laing pang mga atleta.
Nakalampus sab sa maong karera ang nakabunggo nga triathlete. Gikumpirma sab sa iyang inahan nga kasamtangang comatose ug under observation ang kahimtang ni Tayad pagkahuman sa operasyon.
Gikataho sab nga nangayo og medikal nga tabang ang usa ka 55 anyos nga siklista nga si David Smith sa BFP-Panabo gumikan sa pagpanakit sa iyang likod.
via || Bombo LJF
