DAVAO CITY – Wala nagdahum ang turistang taga-Maa, Davao City nga si Bobet Roferos nga ang tulo ka bulang paglatagaw sa nasud Israel, nasantop sa makakuyaw niyang kaagi aron makalingkawas panahon sa pag-ulbo sa gubat tali Israelita ug mga militante gikan Gaza.
Sa ekslusibong pakighinabi sa Bombo Radyo Davao, gisaysay ni Bobet ang iyang kalbaryo sa pagpagita og kaulian paggawas sa nagkagubot nga nasud.
Sumala pa niya, maihap na lamang ang mga flights nga nabilin pagawas sa Israel ug kinahanglan sab niining mugawas aron dili maabtan og lockdown sa Jerusalem.
Hinuon, kampante si Bobet sa dihang atong naabtan siya nga nagpahayag sa iyang mga kasinatian diha sa Jerusalem nga halayong dapit sa Gaza ug TelAviv diin dunay natigayon nga mga pagpangatake.
Sumala pa ni Roferos, halos daghanang mga Pilipino ang nakaalerto sa matag tingog sa sirena aron muadto dayon sa mga bomb shelters nga ilang mataguan panahon sa pagpangatake.
Bastante ang transportasyon apan limitado lamang ang pagaadtuan gumikan sa lockdowns sa halos daghanang bahin sa Israel nunot sa nagpadayong tensyon.
Dugang pa niya, taliwala sa daghanan natong mga kababayan ang dunay laraw nga mupauli na sa nasud, duna gihapon mga Pinoy nga mga trabahante sama sa mga caregivers ang mas gipili nga magpabilin gumikan sa taas nga suholan ug oportunidad.
Gikumpirma sab sa atong kababayan nga halos napapha na sa mapa sa maong lugar ang Gaza nga nahimo na karong groubd zero sa maong gubat.
Daghanang mga refugees didto ang nagtapun-og sa mga refugee camps sa utlanan sa Gaza partikular na sa Egypt.
Gawas sa pagbinayloay og missiles sa duha ka nasyon, nagpahigayon sab og counter strike missions ang militar sa Israel ngadto sa Palestine aron puhagon ang mga myembro sa teroristang Hamas nga nagsugod ning nilabayng adlaw pa.
Mipalag ang UN sa nahimong kontra opensiba sa Israel nga pakawad-an og tubig ug kuryente ang mga natanggong nga katawhan sa Gaza nunot sa gideklarang all-out war batok Palestine.
Karong panahona, gipaabot na lamang ni Bobet ang panahon nga makalingkawas na kini sa maong kagubot ug makabalik na sa iyang pamilya sa musunod nga tuig.
via || Bombo LJF
