DAVAO CITY – Bisan pa man sa hulga sa pagkuyanap sa 2019 novel coronavirus, ang Department of Tourism malaumon gihapon sa pag-uswag sa industriya sa turismo sa Dakbayan bisan man nga gipahunong sa novel coronavirus ang Chinese tourism market sa siyudad.
Sumala ni Department of Tourism Undersecretary Art Boncato, nga sa ilang buhatan, gilauman na nila nga dunay mga hagit nga muabot kanila apan taliwala niini, malaumon pa gihapon sila nga mo-uswag pa ang turismo sa nasud.
Kahinumduman nga bag-ohay lang, mi-isyu si Pangulong Rodrigo Duterte og temporary travel ban sa mga byahedor nga gikan China, Hongkong ug Macau gumikan sa pagsaka sa mga nataptan sa 2019 novel coronavirus.
Dako ang nahimong alkansi sa merkado sa turismo sa mga Chinese sa temporaryong pag ban kanila.
Bisan pa man, malaumon gihapon si Boncato taliwala sa maong hagit.
Lakip sa ilang mga plano mao ang pagmugna sa mga bag-ong merkado diin gitudlo ni Boncato ang DOT 11 regional office ubos sa Regional Director Tanya Rabat nga nagplano og usa ka business mission sa Qatar ug sa BIMP-EAGA kun (Brunei Indonesia Malaysia Philippines East Asean Growth Area).
Ang mga turista gikan sa Peoples Republic of China ang ikaduha sa pinakadako nga ihap sa mga langyaw nga turista nga mianhi sa Pilipinas nga sunod sa mga turisita nga gikan sa South Korea.
