DAVAO CITY – Lain na sab nga disgrasya sa dalan ang nahitabo sa syudad sa Dabaw kini human nga ganihang alas dose sa udto lamang, nagkarambola ang tulo ka mga sakyanan sa Diversion Road, Matina Pangi Davao City.
Daw murag usa ka lata nga napipi ang kahimtang sa usa ka pick-up human nga nabanggaan kini sa usa ka forward truck ug nabangga ug nalahos sab kini sa lain sab nga forward truck sa iyang atubangan.
Hinoon, swerteng naluwas ang mga sakay sa nabanggaan nga pick-up gumikan una nang nakanaog ang mga nahisgutan sa ilang sakyanan una paman kini gikabangga ug gi-daru sa usa ka forward truck.
Nasayran nga una na nga giparada ang pick-up ug mikanaog na sab ang mga sakay niini aron nga mupalit og bahay kubo nga nakadispaly mismo sa kilid sa diversion road.
Busa sa pagbangga sa forward truck sa pick-up, dakong swerte na lamang gumikan walay na-angol o namatay tungod naniniguro sab og ambak gikan sa gimaneho niini nga forward truck ang driver nga si Jason Langob, 25 anyos ug ang lain sab nga duha pa ka mga kaubanan niini.
Subay sa saysay sa driver nga si Langob nga nawad-an matud pa og preno ang gimaneho niini apan naningkamot kini sa pagtimun-timun sa sakyanan aron nga malikayan matud pa ang mas dakong kadaot.
Sa karon, anaa na sa kostudiya sa Talomo Police Station ang driver sa nahisgutang forward truck.
