DAVAO CITY – Padayon karon nga nakatutok ang kapulisan sa mga mapahimuslanon nga mga indibidwal luyo sa gipatuman ang enhanced community quarantine.
Tipik lamang kini human nga nasikop sa otoridad ang tulo ka mga indibidwal nga nadakpan nga nanguha og puthaw sa Brgy 76-A, Times Beach, Ecoland ning dakbayan diin nagpadayon ang konstruksiyon sa coastal road.
Gi-andam na karon ang kaso batok sa mga dinakpan nga nailang sila si Joshua Brigoli Banday, Lloyd Omar Salaban ug Argie Besagas nga susamang nasikop sa mga sakop sa Special Operation Group.
Dali nga miresponde sa lugar ang mga sakop sa kapulisan human nga nakadawat kini ug impormasyon gikan sa project engineer kalabot sa gihimong pagpangawat sa mga suspek.
Una ng narekober sa kapulisan ang kantidad sa P52,000 nga mga puthaw.
Nagpadayon sab karon ang pagpangita sa otoridad sa ilang mga kaubanan nga nakasibat nga nailang sila si Angelito Begasas ug usa ka alyas Tawing nga paspas nga misibat human namatikdan ang mga sakop sa otoridad.
Susama karon nga gipangpaslak sa presohan ang mga dinakpan.
