DAVAO CITY – Napatay sa usa ka hot pursuit operation ang usa ka tulisan human kini nangawat ning nilabayng adlaw sa EMP Village, Brgy. 10-A, Davao City.
Subay sa report sa San Pedro Police, nidangop ang usa ka Vanessa Guiritan Co, 23 anyos nga taga-Brgy. 31-D, Davao City, tungod sa gitahong robbery-hold up ngadto kaniya sa usa ka naka-motor nga lalaki samtang naghulat kini og masakyan sa maong dapit.
Nasignitan ang biktima og kwarta, cellphone, ug gold plated bangle.
Positibong gitudlo sa nahisgutan ang suspek nga si Darwin Abijon Cubellas, 23 anyos, tindero, ug lumulupyo sa Purok 10, Muslim Vill., Brgy.9-A, San Rafael, Davao City.
Sa susamang adlaw, nagpahigayon ang kapulisan og operasyon aron madakpan ang suspek diin nasigpatan nila kini sa susamang lugar.
Inay nga misurrender, mibunot kini sa iyang pusil ug gipamusil ang mga otoridad.
Apan, naig-an kini og bala gikan sa mga pulis nga nagresulta sa iyang hinaling kamatayon pagtabang niini sa SPMC.
Narekober gikan sa suspek ang usa ka kalibre .38 nga pusil ug klase-klase sa bala, ingon man usa ka pakete kon kapin kulang 12 gramos sa gituohang ugang dahon sa marijuana nga nagkantidad og ₱2,040.
