DAVAO CITY – Mikunhod ang public trust rate ni Davao City Mayor Sebastian Duterte subay sa gipahigayong survey sa University of Mindanao.
Namatikdan sa survey nga gipahigayon sa UM Institute of Public Opinion gikan Nobyembre 23 ngadto Disyembre 5, anaa sa 41.4% ang percent trust rate ni Duterte, sulod sa iyang unom ka bulan sa iyang unang termino.
Mas ubos kini itandi sa 59.6% pagsugod pa lamang sa iyang administrasyon kaniadtong Hunyo.
Kon itandi kini sa resulta sa naunang survey, mikunhod ngadto sa 53.6% gikan 67.9% ang ihap sa indibidwal nga labing misalig sa mayor, samtang misaka ang mga nakapamulong nga duna silay “slight trust” sa mayor ngadto sa 34.2% gikan 23.8% sa miaging survey.
Samtang misaka ngadto sa 12.2% gikan 8.3% ang nagpadayag sa pagkawalay salig kang Mayor Duterte.
Sa pikas bahin, nakaangkon usab og gamay nga pagkunhod og public trust rate si Vice Mayor Melchor Quitain Jr., diin gikan 44.1% kaniadtong Hunyo, mikunhod kini og 12.1 ngadto sa 32 percent net trust.
Mikunhod sab kadtong labing nisalig sa bise mayor ngadto sa 38.8 percent gikan 48.2 percent.
Sa pikas bahin, nakaangkon og maayong trust rating ang mga representante sa kongreso sa syudad.
Muabot sa 1,200 ka indibidwal gikan sa tulo ka distrito ang nahimong respondents sa gipahigayong survey.
via || Bombo HJR
