Gibantayan sa state weather bureau ang posibilidad nga mobalik sulod sa Philippine Area of Responsibility (PAR) ang tropical depression (TD) nga si Bising, human kini migawas kagahapong adlawa.
Sa usa ka press briefing sa Philippine Atmospheric, Geophysical and Astronomical Services Administration (PAGASA) kagahapong adlawa, gibutyag ni Assistant Weather Services Chief Chris Perez nga adunay posibilidad nga mosamot pa og kusog ang maong bagyo sa umaabot nga mga adlaw.
Bisan pa og nakagawas na si Bising sa PAR, taas gihapon ang posibilidad nga mobalik kini sa teritoryo sa nasod, subay sa direksyon nga iyang gitumbok.
Sa adlawng Domingo (Hulyo 6), posible kini nga mosulod pag-usab sa PAR, ug sa dihang makasulod kini, posibleng mosaka ang kategorya gikan sa tropical depression ngadto sa tropical storm.
Dunay posibilidad usab nga mosamot pa gyud og kusog kini ug mahimong severe tropical storm samtang anaa pa kini sulod sa PAR sugod sa adlawong Domingo ug sa musunod nga mga adlaw.
Kon kini mahitabo, daku ang posibilidad nga magdala kini og kusog nga pag-ulan sa pipila ka parte sa Luzon, ilabi na sa mga lugar nga daan nang gibahaan.
Matod pa ni Engr. Perez, padayon kini nga gibantayan sa weather bureau, ilabi na tungod sa dala nga mga pag-ulan.
Gipasabot usab sa opisyal nga sulod sa tulo ka sunod-sunod nga adlaw, nakasinati na og pagbaha ang dagkong bahin sa Luzon, ilabi na sa Northern ug Central Luzon, busa kung magpadayon pa ang pag-ulan, daku ang posibilidad nga makahatag kini og lapad nga pagbaha ug mga landslide.
