DAVAO CITY – Mas gipanindot pa gayud ang tribal village sa Magsaysay Park, ning dakbayan sa Davao atol sa IKA-34 nga Kadayawan sa Dabaw sa tibuok bulan sa Augusto.
Kalakip sa kini sa gihimong atraksyon sa Kadayawan.
Sumala pa kang Datu Gorio Gumaanon, 64 sa tribung Ata nga ang ilang balay sagad gayud nga habog ug salog isip depensa batok sa mga pangayaw.
Dugang pa kang Datu Gumaanon nga naandan na nga nagakahitabo ang mga pangayaw sa ilang tribu.
Bisan ang yano nga away sa magti-ayon mosangpot ngadto sa usa ka pangayaw.
Nasayran nga ang mga balay sa mga Ata sa kakaraanan atupan ug panit sa kahoy nga Alangilan apan karon kogon na, hinoon salugan ug bongbongan pa gihapon kini ug panit sa Alangilan.
Uway nga hikot ang nagpalig-on sa ilang mga balay gumikan kay wala sila nagagamit ug lansang.
Si Datu Gorio Gumaanon dunay lima ka mga asawa ug 27 ang iyang mga anak diin ang iyang kamanghoran nga anak 12 anyos pa lamang.
Dunay tagsa ka mga balay ang iyang mga asawa bisan kung managsilinan lamang kini.
