Nagpahimangno ang City Government of Davao sa publiko sa posibleng kabug-aton sa trapiko karong Mayo 25 ug 28, 2025, panahon sa pagdumala sa Shari’ah Special Bar Examination sa Ateneo de Davao University Senior High School Campus sa Bangkal (ADDU-SHS). Bisan walay ipatuman nga road closures o rerouting, gilauman ang pagsinipit sa dagan sa sakyanan ilabi na sa General Douglas MacArthur Highway ug mga kasikbit nga kalsada.
Gi-awhag ang katawhan nga molikay sa pagbuhat og dagkong kalihokan sama sa mga parade, salubong, concert, party, karaoke, ug uban pang kasaba nga kalihokan nga mahimong makaapekto sa kahapsay sa pagpahigayon sa maong espesyal nga bar exam. Gikinahanglan ang hilom ug malinawon nga palibot aron matabangan ang mga mag-exam nga makapokus sa ilang paningkamot.
Samtang giabisohan usab ang tanan nga hugot nga ipatuman ang daghang ordinansa sa dakbayan atol sa maong adlaw, lakip na ang Liquor Ban Ordinance, Noise Curfew Ordinance, Curfew for Minors, ug ang Total Smoking Ban. Ingon man gihangyo sa lokal nga kagamhanan ang suporta ug kooperasyon sa tanang lumulupyo alang sa kalampusan sa maong nasudnong eksaminasyon.
