DAVAO CITY – Adunay gipagawas nga pahibalo ang Davao City Transport and Traffic Management Office alang ngadto sa mga motorista ning dakbayan sa Davao. Gipagawas sa buhatan ang mga traffic Scheme nga ipatuman sa Magsaysay Avenue, gikan Post Office hangtud sa Suazo Street.
Kabahin kini sa Underground Distribution System (UDS) Project sa Davao Light and Power Company (DLPC), nga gimandato sa siyudad sa Dabaw pinaagi sa City Ordinance No. 0152-17, Series of 2017.
Makita sa mga mapa ang 3 ka klase nga traffic scheme nga ipatuman diin depende kini sa color sa box nga anaa sa taas nga bahin sa matag mapa. Una, ang color 𝙇𝙞𝙜𝙝𝙩 𝘽𝙡𝙪𝙚 nagpasabot nga ang traffic scheme, ipatuman panahon sa kagabhion o gikan alas nueve sa gabii hangtud na sa alas singko sa buntag. Ang 𝙔𝙚𝙡𝙡𝙤𝙬 nagpasabot nga ang traffic scheme ang ipatuman pagka buntag ug ang color 𝙍𝙚𝙙 mao ang traffic scheme nga ipatuman sab kung ugaling bug-at na kaayo ang dagan sa trapiko sa lugar kung asa gina-trabaho ang proyekto.
Busa, nag-awhag na lamang karon ang buhatan sa CTTMO ngadto sa tanang gaagi sa nahisgutang lugar nga magbinantayon sa mga traffic signs aron dili maka dungag sa kabug-aton sa dagan sa trapiko.
