DAVAO CITY – Nangunay mismo ang mga personahe sa Traffic Group ug uban pang security unit sa pag-butang og mga packaging tape sa mga pampasaherong dyip aron magsilbing giya sa tukma nga social distancing sa mga pasahero.
Kahinumduman nga aduna pa gihapoy pipila ka mga PUJ nga wala mitamud sa social distancing hinungdan nga usa kini sa mga gibantayan karon sa otoridad.
Sumala pa kang P/LTC Nolan Raquid, head sa Traffic Group, nga kung mamahimo, dili nila buot nga mo-isyu og citation ticket karong panahona ilabi na nga naglisud sab karon ang katawhan gumikan sa gipatuman nga community quarantine hinungdan nga ila lamang kining pahimangnoan ug giyahan sa tukma nga polisiya.
Samtang sa bahin sa Social distancing, gibarugan ni City Transport and Traffic Management Office (CTTMO) head Dionesio Abude nga hugtanon pa gihapon nila nga ipatuman ang No Back ride Policy sanglit lisud sumala pa nga i-trace kun ugaling positibo sa Covid-19 ang driver sa motor nga namasahero ug na-infect niini ang iyang angkas.
Dili sab sumala pa itugot ang pag-angkas sa motor sanglit wala sab na practice niini ang Social distancing.
