DAVAO CITY – Nagpadayon gihapon ang pagpaniid sa kapulisan sa mga posibleng anggulo sa kamatayon sa hit and run victim nga si Ana Mae Talili, lakip niini ang pagkalambigit ni Boston, Davao Oriental Vice Mayor John Paul Lampig.
Sumala pa ni Davao City Police Office – Traffic Enforcement Unit Head na si Police Major Dexter Domingo, naghatag na og testimonya si Lampig mahitungod sa insidente ug matud pa iyang gikanayon nga wala siya kadtong higayon nga nahitabo ang aksidente.
Dugang pa sa opisyal, nagpakita pa si Lampig ug flight manifesto nga nagdetalye na Enero 28, bandang alas-8:30 sa gabii dihang nitugpa ang gisakyan nga eroplano, ug Enero 29 dihang pag-uli niya, ayha pa niya nasayran gikan sa iyang drayber nga si Jester Yucosing nga nakadisgrasya kang Talili ang puti nga pick up nga gimaneho ni Yucosing.
Matud pa sa opisyal, wala gihapon gisirad-an sa kapulisan ang posibilidad nga nalambigit ang nahisgutang politiko sa kamatayon sa estudyanye.
Sa pikas bahin, gibutyag ni Police Major Domingo nga adunay plano ang suspek nga si Yucosing nga daganan ang krimen nga nahimo, diin una na diay siya nalambigit sa usa ka aksidente kaniadto pang Nobyembre gamit ang susamang sakyanan nga gigamit atol sa pagkadisgrasya ni Talili.
Kaniadtong Lunes, nagpasaka na og kasong reckless imprudence resulting to homicide, physical injury, and damage to property ang pamilyang Talili batok sa drayber.
Duha ka adlaw human gihatod si Anna Mae sa iyang ulahing kapahulayan kaniadtong Pebrero 4, ning kasamtangang tuig.
via || Bombo LJF
