DAVAO CITY – Gipasabot sa Davao City Covid-19 Task Force nga pabilin pa gihapon nga ipatuman karun ang traditional nga contact tracing, swabbing ug quarantine ingon man isolation program sa dakbayan bisan pabilin karun nga ubos ang ihap sa mga natakdan ug Covid-19.
Kahinumduman nga sa ulahing datus sa Department of Health (DOH), nagpabilin nga ubos ang ihap sa Covid-19 cases uban ang positivity rate nga 1.15 percent.
Una ng gibutyag ni Davao City Covid-19 Task Force Spokesperson Dr. Michelle Schlosser nagpabilin sa “accepted rate” ang mga kaso sa Covid-19 dinhi sa dakbayan gumikan kay ubos kini sa lima ka porsyento.
Apan luyo niini, padayon sumala pa nga ipatuman sa dakbayan ang PDITR strategy, o ang Prevention, Detection, Isolation, Treatment, ug Reintegration arun nga mapabilin ang Covid-19 cases ngadto sa minimum case.
Subli sab kini nga nanawagan sa publiko nga batasanon pa gihapon ang pag-obsserba sa health protocols ug kinahanglan nga magpabakuna diin kini sumala pa ang usa sa mga rason nga nagpabilin ang dakbayan sa Alert level 1 hangtud Mayo 15.
Bisan nga ang uban nga lugar sa nasud ang anaa sa Alert Level 2, ang interzonal o local travel dinhi sa Davao region ang dili apektado hinungdan nga posible pa gihapon ang pagkatag sa kagaw.
Padayon sab karun nga nangandam ang dakbayan alang sa posibleng surge sa Covid-19 nga hatud sa Omicron variant nga BA 2.12, nga una ng na-detect sa Baguio City.
