DAVAO CITY – Andam na ang Police Regional Office (PRO) Davao sa pagpakatag sa ilang tracker team latas sa rehiyon aron nga pangitaon ang nahibilin nga 39 heinous crime convicts nga pakyas sa pagtahan sa gihatag nga lugway ni Pangulong Rodrigo Duterte kaniadtong Setyembre 19.
Base sumala pa sa ilang datus kaniadtong sabado, gikan sa 76 heinous crime convicts (HCC) nga anaa sa Davao Region, 17 pa lamang niini ang mitahan.
Ang Davao City Police Office (DCPO) adunay pinakataas nga anaa sa walo; Davao del Norte Police Provincial Office (DNPPO) tulo; Davao del Sur PPO duruha; Compostela Valley PPO anaa sa tulo; ug Davao Oriental ug Davao Occidental Police Provincial Office adunay tig-usa.
Upat sab ang mitahan sa Philippine National Police (PNP) apan wala sila sa listahan nga sakop sa Davao Region.
Laing 20 ang mitahan sa Davao Prison and Penal Farm hinungdan nga 39 pa gihapon ang nagpabilin nga gawasnon.
Una ng gibutyag ni PRO-Davao Director Marcelo Morales nga ayha nila ipahigayon ang launching sa massive manhunt, hulaton una nila ang kamandoan gikan sa ilang national headquarters.
