Nakabsan sa kinabuhi ang usa ka 25-anyos nga construction worker human nga nahulog sa usa ka lungag sa construction site sa Samal Island–Davao City Connector (SIDC) Bridge sa Purok 2, Barangay Caliclic, Babak District, Island Garden City of Samal, Davao del Norte.
Subay sa report gikan sa kapulisan, nahitabo ang insidente alas 9:10 sa buntag sa nakalabay nga adlaw, Hulyo 23, 2025.
Giila ang biktima nga si Welmar Melicio Lagunsay, residente sa Purok Mindahilia, Esperanza, Sto. Tomas, Davao Del Norte.
Subay sa gipahigayon nga imbistigasyon sa mga otoridad, nag-andam sumala pa si Lagunsay sa pagbubo og semento ngadto sa board pile sa tulay nga gitukod sa China Road and Bridge Corporation, apan kalit lamang kining nawad-an og balanse ug nahulog.
Sa pakiguhinabi sa ihanan sa biktima, nagtuman lamang sa iyang trabaho ang iyahang anak sa dihang nahitabo ang aksidente.
Samtang gibutyag usab sa project foreman nga si Jesus Cablian, 54 anyos, nga residente sa Barangay Poblacion, Monkayo, Davao de Oro, nga nakasaksi mismo sa panghitabo nga disgrasya ang nahitabo.
Nakaangkon og samad sa ulo ug nawong ang biktima nga miresulta sa iyahang hinanaling kamatayon.
Sumala pa sa mga otoridad, gidala pa ang biktima sa Samal Zone Hospital sa Barangay Peñaplata, apan gideklara kining dead on arrival.
Subay sa medical findings,nakitang hinungdan sa iyahang kamatayon ang Acute Respiratory Failure Type 1 nga resulta sa Traumatic Brain Injury.
Sa pagkakaron, gihaya na ang biktima sa iyahang kabanay sa Rivera Funeral Homes sa ilahang lugar.
Ning panahuna, naglusad pa usab og lawom nga imbistigasyon ang mga otoridad aron masuta kung nasunod ba ang hustong safety measures sa maong construction site.
