DAVAO CITY – Dako ang gisaka sa tourist arrival sa dakbayan sa dabaw atol sa ubang bahin sa kasamtangang tuig 2022. Subay sa record sa city tourism operations office, moabot sa kapin 181,000 ka mga local ug langyaw nga torista ang miabot sa dakbayan sa dabaw gikan sa bulan sa Enero hangtud Abril ning tuiga.
Ang nahisgutang ihap ang mas taas sumala pa kung itandi sa tourist arrival sa dakbayan sa dabaw nga gilata sa susamang bulan niadtong milabay nga tuig 2021.
Apan ang nahisgutang ihap ang mas ubos kung itandi sa gikatala niadtong nakalabay nga tuig nga wala pa nasinatian ang pandemya, diin ang dakbayan ang makatala ug 150,000 matag bulan nga tourist arrival.
Hinuon, gikanayon ni City tourism officer Generose Tecson, ilang gilauman nga mosaka pa ang ihap sa mga torista nga moabot sa dakbayan sa dabaw ilabi na kay nagsingabot na usab ang kasaulugan sa Kadayawan festival sa bulan sa AGosto, ug sa mas gipaluagan nga restrictions.
Samtang, dako usab ang pasalamat sa accomodation sector gumikan kay misaka na usab karon ang ilang occupancy rate ilabi na nga kadaghanan sa mga arrivals alang sa MICE events nga sa ilang venue ginapahigayon.
Gitala sa CTOO ang 80% nga occupancy rate sa accommodation sa syudad.
