DAVAO CITY – Nagpabilin pa gihapon karun nga suliran sa mga indibidwal nga nalambigit sa illegal nga druga hinungdan nga walay undang sab ang otoridad paggukod sa mga nahisgutan.
Kagahapong adlawa sikop ang Top 6 High Value Target sa Regional Level ug laing duruha pa atol sa gipahigayon nga buy bust operation sa mga personahe sa Sta Ana Police Station 1 ning siyudad.
Una ng naila ang dinakpoan nga si Edlino Añana Estillore alyas “Lino” 38 anyos, residente sa 214, R.Castillo St., Brgy. Agdao Proper, Davao City ug giilang Top 6 High Value Individual sa Regional Level nga sila si Tommy Roma Martinez, 41 anyos ug Anith Pandong Abellameda, 46 anyos nga susamang residente sa Purok San Antonio, Brgy. Agdao Proper, ning dakbayan.
Nasikop ang mga nahisgutan sa 21-A, R.Castillo St., Brgy. Agdao Proper, Davao City human nga usa sa mga kapulisan ang nagpaka-arun ingnon nga buyer.
Narekober gikan sa posisyon sa dinakpan ang duruha ka mga pakete sa ginadili nga druga nga adunay gibug-aton nga kapin kun kulang 10 gramo ug adunay street market value nga Php170,000.00 ingon man ang marked money nga gigamit sa otoridad.
Kalakip sab sa nakuha ang usa ka .38 caliber pistol nga adunay tulo ka mga buhing bala.
Gikatakda na nga pasakahan ang mga nahisgutan ug kasong paglapas sa Republic Act 9165 o Comprehensive Dangerous Drugs Act of 2002 ug Republic Act 10591 o Comprehensive law on Firearms and Ammunition.
Daku ang pagtoo sa kapulisan nga pagkasikop sa mga suspek makapakunhod sa mga transaksiyon sa illegal nga druga sa nahisgutan nga dapit.
