Nasikop sa usa ka pinasidungang manhunt operation ang usa sa labing gipangita nga kriminal sa Davao del Sur nga nailhan lamang sa alyas nga “Boy”. Ang operasyon gipangulohan sa Provincial Intelligence Unit (PIU) ubos sa pamuno ni PCPT Joseph Orrobel S. Pojas, ubos sa direktiba ni PLTCOL Darwin E. Taypin. Kauban sa operasyon ang Matanao Municipal Police Station nga gipangulohan ni PCPT Junrey L. Torres, DCOP, ubos sa superbisyon ni PMAJ Jeffmar T. Tercero, Chief of Police, ug ang mga elemento sa RSOG 11, 2nd Davao del Sur Provincial Mobile Force Company, ug RPSB Cluster 6.
Gibug-aton sa operasyon ang pagdakop ni alyas “Boy”, usa ka single nga residente sa Matanao, Davao del Sur, nga giilang Top 4 Most Wanted Person sa tibuok probinsya. Nadakpan siya pinaagi sa warrant of arrest alang sa kasong murder ilawom sa Article 248 sa Revised Penal Code nga walay piyansa. Ang maong mando sa pagdakop gi-isyu ni Hon. Carmelita Sarno Davin, Presiding Judge sa RTC Branch 18 sa Digos City, niadtong Enero 22, 2024. Natultulan ug nasikop ang suspetsado sa Sitio Akmarok, Barangay Dongan Pekong sa maong lungsod.
Gawas sa warrant, narekober usab gikan sa suspetsado ang mga ilegal nga butang sama sa usa ka homemade long firearm nga gitawag nga “Baliuntod” nga adunay duha ka buhing bala, usa ka fragmentation grenade, upat ka bala sa 7.62mm, ug lain-laing personal nga gamit. Sa karon, ang dinakpan ug ang tanang ebidensya gidala sa Matanao Municipal Police Station alang sa hustong pagproseso sa dokumento ug pagsang-at sa dugang nga mga kaso. Samtang padayon usab ang kapulisan sa Davao del Sur sa ilang paningkamot sa pagpanalipod sa katawhan ug pagpatuman sa balaod aron masiguro ang kalinaw ug seguridad sa komunidad.
