DAVAO CITY – Nagpasidaan ang usa ka political analyst nga nakahinabi sa Bombo Radyo Davao sa mamahimong epekto sa nahitabong gubat tali Israel ug Palestine gumikan sa kalit nga pag-atake sa pwersang Hamas nga gikaapektohan sa libuan ka mga sibilyan.
Sumala ni Ramon Belleno III, lauman ang pagmahal sa presyo sa mga produktong petrolyo ingon man pagsaka sa inflation rate sa nasud gumikan sa gikabalakang pagnihit sa suplay sa lana sa Middle East.
Dugang pa, makabalaka sab ang maong kahimtang alang sa daghanang mga Pilipino nga nagtrabaho sa maong nasud dungan sa pipila ka mga taho nga pag-hostage sa grupong Hamas sa mga Pilipino ug daghanang sibliyan.
Gitataw sab sa eksperto nga mas mulungtad ang gubat tali Israelita ug Palestino luyo sa pagdapig ingon man pagpakita og suporta sa ubang makakagagahum nga nasud sama sa Estados Unidos ngadto sa Israel.
Nanghinaot ang eksperto nga taliwala pa man sa managlahing tinhuan sa duha ka kanhi magkaalyadong nasud, maangkon gihapon sa duha ang diplomasya pinaagi sa mas hugtanon apan malig-unong kasabutan alang sa kalinaw ug kahupayan sa duha ka mga nasud.
Sa pagkakaron, nisaka na sa lapas 1,500 ang natalang patay sa nagpahinabong pag-atake sa nasud nga gilangkuban sa 900 ka mga Israelita ug 687 ka mga Palestinians.
Gipakatap na sa Israel ang 300,000 ka mga reserve soldiers isip kabahin sa pagpangatake sa Gaza.
via || Bombo LJF
