DAVAO CITY – Gibutyag ni DENR 11 regional director Bagani Fidel Evasco nga nagpasaka og temporary restraining order ang resort owner nga pamilyang Rodriguez sa Korte Suprema aron ipahunong ang Samal Island-Davao City Connector project.
Nasayran nga nag-file ang pamilya og writ of continuing mandamus kaniadtong Pebrero sa pinakahataas nga korte sa nasud aron mapugngan ang pagtukod sa tulay.
Gipaklaro ni Evasco nga anaa sa Samal Island ang maong reklamo tungod sa Foreshore Lease Agreement.
Apan dinhi sa Davao City, walay mamahimong babag sa pagtukod sa tulay tungod walay indibidwal nga nagpasa og Foreshore Lease Agreement gikan sa marine protected area nga Barangay Hizon ning dakbayan diin matunong ang alignment sa pagatukurong tulay.
Ang pamilya Rodriguez ang tag-iya sa duha ka resorts sa Samal Island diin manukad ang proyekto.
Kahihumduman nga gipahingusgan sa resort owners ang posibleng kadaot nga hatud sa maong proyeto sa kadagatan sa Samal.
Kasamtangang ginahulat na lamang sa ilang multi-partite monitoring team ang mando gikan sa Korte Suprema alang sa mamahimong aksyon niini.
via || Bombo LJF
