DAVAO CITY – Gitambagan karon sa Task Force Davao ang mga driver ug ang mga motorcycle riders sa syudad nga dili i-parking ang ilang mga sakyanan o mga motorsiklo sa mga lugar nga daghan ug mga tawo.
Ang nahisgutang pahayag ang giluwatan sa TFD human mahitabo ang pagbusikad sa Public market sa Isulan, Sultan Kudarat niadtong sabado nga gika-angol sa 8 ka mga tawo, ug sa suicide bombing kagahapon sa Indanan Sulu nga miresulta sa kamatayon sa bomber.
Tungod niini, girekomenda usab sa TFD ngadto sa mayor sa syudad nga usbawan ang penalty sa illegal parking sa mga sakyanan sa mga crowded areas gikan kinyentos ngadto na sa dos mil ka pesos.
Kini gumikan kay ang mga sakyanan ug ang mga motor maoy sagad nga ginagamit sa mga terorista sa paglusad ug mga pagpamomba o IED attacks.
Subling gipahinumduman niini ang katawhan sa syudad nga dili mag-panic, inay mag-focus sa kung unsa ang ikatampo aron makatabang sa paghatag ug seguridad sa syudad.
Matag usa angayang makakat-on sa culture of security, ug i-report ang mga katahapang mga tawo ngadto sa mga otoridad.
