DAVAO CITY – Hugtanon na sab ang gipatuman karun nga mga lakang sa mga sakop sa Task Force Davao arun lamang masiguro ang lig-on nga seguridad sa dakbayan atol ning paghinumdom sa Semana Santa diin lauman sab nga daghanan ang mga mosulod dinhi sa dakbayan.
Tungod niini adunay mga augmentation ang mga sakop sa Task Force Davao arun lamang masiguro nga mapatuman ang kahusay ug kalinaw ning panahon sa kuwaresma.
Una ng gibutyag ni Colonel Darren E. Comia, commander of Task Force Davao nga mihangyo sila ug dugang mga sakop sa 10th Infantry Division arun nga i-augment arun mutabang sa pagbantay sa 29 Roman Catholic churches sa dakbayan.
Mahinungdanon nga ipatuman karon ang hugtanon nga seguridad sanglit laoman ang pagdagsa sa mga tawo ilabi na nga mas lu-ag na karun ang restrictions sukad nga nagsugod ang outbreak sa Covid-19.
Mihangyo na lamang ang opisyal ngadto sa publiko ug pagsabot gumikan kay mas hugtanon ang ilang ipatuman nga mobile checkpoints kaabag ang mga sakop sa Davao City Police Office.
Nanawagan sab kini sa publiko nga makighiusa sa gipatuman nga culture of security nga “pag may nakita dapat magsalita”.
Sa higayon nga mutambong sa mga aktibidad sa simbahan, hugtanon nga gidili ang pagdala ug Backpack ingon man pagsuot ug Jacket; mamahimong magdala ug transparent nga water container ug transparent usab nga bag alang sa mga adunay dala nga bata.
