DAVAO CITY – Nagpalabang og resolusyon ang Davao Del Norte Provincial Tribal Council nga nagdeklarar kang Tagum City Mayor Rey Uy nga persona non grata human sa diskriminasyon batok sa Indigenous Cultural Communities o Indigenous People.
Lakip sa gideklarar nga persona non grata si Acting Governor Oyo Uy tungod sa kakuwang sa aksyon sa maong insidente.
Base sa resolusyon, nipahigayon og inspeksyon sila Mayor Uy, uban sa acting governor kansang anak niini sa lugar sa Provincial Disaster and Risk Reduction Office niadtong Abril 13.
Sa gipagawas sab nga audio clip, madunggan nga gipangsita ni Uy ang mga sakop sa PDRRMO nga nagluto sa kusina sa maong opisina atol sa inspection. Sumala sa grupo, madunggan sab ang pagtawag ni Mayor Uy sa mga IPs isip “tapulan.”
Sumala sa resolusyon, kawalay-respeto kining gibuhat sa mayor ug kini sab ang gikonsiderang pagsalikway sa tawhanong katungod sa mga IPs.
Hugot nga gikondena sa mga lumad sa probinsya ang maong mga pamahayag ni Mayor Uy. Nagpasabot niini nga dili na tugotan ang mga nahisgutang opisyal nga makasulod sa ancestral domain sa mga lumad sa probinsiya.
Kahinumduman nga nagatapok ang mga lumad sa kapitolyo aron paghatag og suporta kang suspended Governor Edwin Jubahib atol sa adlaw sa pag-isyu og suspension niadtong Abril 11.
Sa pagkakaron, wala pa nagpagawas og pamahayag si Mayor Uy kalabot sa maong resolusyon.
via || Bombo LJF
