DAVAO CITY – Gikumpirma sa Southern Philippines Medical Center ang pagsaka sa ihap sa mga sa admission sa mga pasyenteng adunay sintomas sa COVID19.
Sigun sa gipagulang datos sa ospital, nasa 50 na ka mga pasyente nga dunay COVID symptoms ang gidawat gikan niadtong Abril 5 ning tuiga.
Subay sa monitoring sa Davao City Health Office, namatikdan ang 234 ka mga aktibong kaso dinhi sa Davao City as of April 12. Samtang gikatala kagahapon ang 48 ka mga bag-ong kaso.
Una nang gipaklaro sa DOH – Davao nga walay dapat ikaalarma tungod gisiguro niini nga dili “surge” ang maong subling pagsaka pag-usab sa mga gipang-COVID karong taknaa.
Sumala ni DOH-Davao Regional Epidemiology Surveillance Unit head Dr. Rachel Pasion, nasantop sa 12.2% ang positivity rate sa dakbayan nga taas sa acceptable rate nga gitagana sa WHO nga ubos sa 5% lamang.
Gipaklaro hinuon sa officer-in-charge sa Davao City Health Office nga si Dr. Marjorie Culas, mild ngadto sa asymptomatic ang sagad sa mga kaso sa COVID.
Sa kasamtangan, walay nadawat nga mga mandato gikan kang Davao City Mayor Sebastian Duterte mahitungod sa pagpabalik sa mandatory nga pag-sul-ob og face mask sa tibuok dakbayan.
Apan, gipahinumduman gihapon ang katawhan nga sundon ang minimum health standards.
via || Bombo LJF
