DAVAO CITY – Nagpadayon karon ang gipahigayon nga swab test sa mga residente sa Davao de Oro partikular na sa dapit diin natala ang kaso sa bag-ong B.1.1.7 kon UK variant sa COVID-19.
Kahinumduman nga una ng gibutyag sa Department of Health (DOH) nga natala ang kaso sa Compostela ug New Bataan sa nahisgutan nga lalawigan.
Sa kasamtangan gihulat na lamang ang resulta sa swab test sa kapin 300 ka mga residente nga posibleng nakahimamat sa mga nagpositibo nga pasyente.
Kahinumduman nga hangtud third degree ang gihimong contact tracing kini aron masiguro nga mapugngan ang transmission sa kagaw ilabi na nga paspas ang pagkatag niini.
Sa kasamtangan, okupado sab ang lokal nga kagamhanan sa Davao de Oro sa pagpahinumdom sa mga residente nga ipabilin ang health protocols ug likayan ang paglakaw ilabi na kung dili kini mahinungdanon.
Una na sab nga gikumpirma sa Davao City Health Office nga usa sa mga nagpositibo sa bag-ong variant ang nanimuyo dinhi sa dakbayan sa Davao apan nakarekober na kini.
Via // Bombo Emman Dela Peña
