DAVAO CITY – Lugwayan sumala pa ang suspensiyon sa direct flights gikan Davao paingon Jinjiang ug Hong Kong sa ulahing semana karong bulan sa Marso. Kini ang gikumpirma sa operations center (Opcen) sa Davao airport.
Sumala pa kang Opcen assistant manager Kristine Habla nga una na matud pa nga gibutyag sa kadumalahan sa Xiamen Airlines, nga ilang lugwauan ang flight suspension gikan sa Marso 8 ngadto na sa 29 ning kasamtangan nga tuig.
Una ng gikansela sa Xiamen Airlines ang tanan nila nga Davao ug Jinjiang direct flights sa tibuok bulan sa Pebrero.
Samtang ang Davao to Hong Kong flights sa Cathay Dragon Airlines, nagsugod ang ilang suspensiyon sa Pebrero 11 ngadto na sa Marso 27.
Nasayran sab kang Habla nga lakip ang Cebu Pacific Air (CebPac) ang nagsuspende usab sa ilang Saturday flights gikan Davao paingon Singapore o vice versa samtang ang mga flights sa Martes, huwebes ug dominggo ang pabilin nga operational.
Gipatuman ang mga flight cancellations sa mga airline companies sugod Pebrero isip preventive measures batok sa pagkatag sa novel coronavirus nga hinungdan sa coronavirus disease (Covid-19).
