DAVAO CITY – Ipatuman karong adlawa ang suspensiyon sa klase sa pipila ka mga tulonghaan ning dakbayan human ang nasinatian nga pag-bundak sa kusog nga ulan nga maoy hinungdan sa kusog usab nga pagbaha.
Sa gipagulang kamandoan ni Davao City Vice Mayor Pulong Duterte suspendido ang klase sa mga piniling public ug private schools sa dakbayan nga gilangkuban sa Wangan Technical High School, Calinan; Balengaeng Elementary School, Tugbok; Leon Garcia Elementary School, Talomo; Talomo Central Elementary School, Talomo ug uban pang mga public ug pribadong tulonghaan sa Calinan, Tugbok, ug Talomo Districts.
Laoman nga adunay dakong kadaot sa mga butang sa mga tulonghaan ingon man sa mga panimalay ang kusog nga pagsaka sa tubig baha nga nagsugod pasado alas singko kagahapon sa hapon.
Daghanan sa mga residente ang mibakwit human nga apektado ang ilang mga panimalay sa pagbaha partikular na sa may Bangkal ning dakbayan sa Davao.
Gilayon sab nga miresponde sa lugar ang mga nagkadaiyang hingtungdan nga ahensiya sa kagamhanan aron nga daling matabangan ang mga residente nga temporaryong gipabakwit.
Dali sab dayon nga gipalong ang kuryente sa mga apektadong lugar aron nga malikayan ang disgrasya.
Nanawagan sab karon ang lokal nga panggamhanan ug hinabang nga daling mahatag sa mga apektadong residente.
