DAVAO CITY – Temporaryong nibiya sa kapitolyo sa probinsya sa Davao del Norte si suspended Governor Edwin Jubahib, usa ka adlaw human sa iyang pagsaulog sa ika-50 nga adlawng natawhan.
Gipadayag sa maong opisyal nga anunsyo kagabii, Abril 28, nga ang maong desisyon nga temporaryong mobiya sa Provincial Governor’s Office alang sa kaayohan ug kaluwasan sa mga empleyado sa provincial capitol.
Nunot kini sa sunod-sunod nga mga panghitabo human sa preventive suspension nga gipahamtang kaniya.
Matod niya, mubalhin siya sa Official Residence of the Governor nga mao ang Tahanan ng Punong Lalawigan, nga nahimutang sulod sa Kapitolyo.
Kauban sa mga Mayor ug Bise Mayor sa probinsiya, si Jubahib, inubanan sa iyang anak nga si Clarice, milugsong ngadto sa ground floor sa Admin building, diin giabiabi siya sa mga Lumad nga nagpundo sa gawas sa kapitolyo.
Gihimug-atan ni Jubahib nga bisan pa sa kahimtang karon sa politika, magpadayon siya sa pag-alagad sa mga Dabaonon ug magpabiling lig-on isip pinili nga alagad sa publiko.
Mipadayag sab kini sa iyang pasalamat sa mga empleyado sa provincial Capitol sa ilang pagbarog tupad kaniya, ingon man ang mga Lumad nga boluntaryong nanalipod ug sa iyang mga tigpaluyo sa pagpabilin sa ilang pagtuo kaniya.
Nagpabiling epektibo hangtod karong taknaa ang 60 day suspension nga gipakanaog sa Office of the President ug sa Department of the Interior and Local Government kon DILG gumikan sa mga akusasyon nga misuse of authority, potential oppression, ug utilization of government funds aron mapauswag ang interes sa usa ka pribadong kompanya.
