DAVAO CITY- Patay na nga miabot sa ospital ang usa ka suspek sa giingong pagpang-hostage sa usa ka lalaki ngadto sa iyahang kaipon pasado alas 12:00 ang takna kaganihang udto sa Keith Williams Bypass Road, Barangay Catalunan Pequeño, ning syudad sa Davao.
Subay sa report sa kapulisan, ang suspek ang giila nga si Alias “Pulong”, hamtong ang panuigon samtang ang biktima mao si Alias Amor, hamtong sab pangidaron, nga susamang nanimuyo sa Block 14 Lot 23, Wellspring Village 2, Barangay Catalunan Pequeño ning syudad sa Davao.
Samtang adunay laing biktima nga sumala pa sa kaulisan nadamay sa maong panghitabo nga si Ian Regner, 24-anyos,ulitawo nga residente sa Pag-Ibig Barangay Catalunan Pequeño, ning syudad sa Davao.
Sa imbistigasyon sa mga otoridad, gi-hostage sumala pa sa suspek ang iyahang kaipon sa wala masayri nga hinungdan daplin sa karsada nga maoy hinungdan nga girespondehan kini sa kapulisan.
Apan atol sa pagsita ngadto sa suspek nagdumili kini nga motahan sa kaugalingon ug misulay pa kini sa pagsibat pinaagi sa pagpadagan sa iyahang motorsiklo sakay ang iyahang kaipon hinungdan nga gigukod kini sa SWAT team hangtod nga nakorner kini ug mibunot sa iyahang armas nga maoy hinungdan nga napusilan kini sa mga otoridad.
Samtang atol sa panghitabo nadamay ang usa ka nagmotor nga si Ian Regner nga miresulta sab sa pagka-angol niini nga karon anaa na sa luwas nga kahimtang.
Ning panahuna nagpadayon pa ang gihimong imbistigasyon sa kapulisan kung unsay hinungdan sa maong panghtabo.
