DAVAO CITY – Gikustodiya na sa Traffic Enforcement Unit sa Davao City Police ang nakadisgrasya ug nakapatay sa college student nga si Ana Mae Talili.
Giila sa TMU sa pagpanguna ni PMaj. Dexter Domingo ang suspek nga si Jester Yucosing, 40 anyos.
Samtang giila sab ang sakyanan nga gipanag-iyahan sa bise mayor sa Boston, Davao Oriental nga si John Paul Lampig.
Una na kining gireport ni Vice Mayor Lampig ngadto kang PRO 11 Regional Director Police Brigadier General Benjamin Silo Jr.
Kasamtangang ginahulat ang musunod pang mga lakang batok sa suspek sa hit-and-run nga gikamatyan ni Talili kaniadtong Enero 26 sa McArthur Highway Matina ning dakbayan, pasado alas 12:40 sa tungang kagabhion.
Sumala pa sa imbestigasyion, sakay si Talili sa motorsiklo sa iyang uyab dihang mihunong sila sa traffic light.
Apan kalit silang gidasmagan sa nag-beating the red light nga pick up nga gikatahong paspas nga nagmaneho sa sakyanan ug dali dayong nakaikyas ang maong suspek.
Nakahiagum ug ilabihang injury ang dalaga gumikan sa pagkabangga nga nagresulta sa iyang kamatayon.
Kahinumdumang gipapatungan ang responsable sa ulo og P500,000 nga reward ni kanhi Pangulong Rodrigo Duterte alang sa mga makatudlo sa gikahimutangan niini.
via || Bombo LJF
