DAVAO CITY – Gikumpirma sa San Pedro PNP nga nadala na ngadto sa Southern Philippines Medical Center kon SPMC-Institute of Psychiatry and Behavioral Medicine ang suspek sa nahitabong Bankerohan Crash Insident nga si Crenenandy Rodriguez Cadiente, 44 anyos, nga gitudlong nagmaneho sa nabiyaang nag-andar nga Military Truck sa Task Force Davao ug nakaligis sa lima ka mga indibidwal niadtong Disyembre 24, bandang alas-5:30 sa buntag.
Sumala ni Police Major Marvin Hugos, ang Station Commander sa San Pedro PNP, kini aron sutaon kung mentally challenged ang suspek.
Nasayran sab nga atol sa pag-imbestiga, dunay mga nakuha nga prescription kon reseta sa mga gamit sa suspek.
Samtang gikumpirma sab sa Davao City Police Office nga pursigido ang mga pamilya sa biktima ng magpasaka og reklamo batok kang Cadiente.
Gawas sab niana, buot ipahamatang kang Cadiente ang kasong reckless imprudence resulting in homicide and damage to properties.
Sa pikas bahin, imbestigahan sab sa Armed Forces of the Philippines ang maong insidente nga nakaangol sa tulo ka mga indibidwal ug nakapatay sa duha pa ka mga mamalitay sa Bankerohan.
Kahinumduman nga gimandoan na sa Eastern Mindanao Command kon EastMinCom ang Joint Task Force Haribon, nga naggunit sa TF Davao aron maglusad og imbestigasyon sa nahitabong aksidente.
