DAVAO CITY – Nakapasaka na ang San Pedro Police og kasong reckless imprudence resulting in multiple homicide, multiple injuries and damage to properties batok sa gitudlong suspek sa nahitabong Bankerohan Crash Insident nga nakaangol sa daghanang sibilyan niadtong Dominggo, Disyembre 24.
Kahinumduman nga giila ang maong suspek nga si Crenenandy Rodriguez Cadiente, 44 anyos nga taga-Purok 12 St John, Bucana, nga nakamaneho sa KM450 military truck sa Task Force Davao nga gi-parking sa may Pichon St. duol sa Bankerohan Publuc Market.
Nadala na ngadto sa Southern Philippines Medical Center kon SPMC-Institute of Psychiatry and Behavioral Medicine ang suspek aron sayron ang sumala pa, nagpahiping kondisyon sa pang-isip niini.
Ginahulat na lamang sa San Pedro Police ang resulta sa Institute of Psychiatry and Behavioral Medicine nga magamit isip ebidensya batok sa suspek.
Kahinumduman nga sa maong insidente, nakabsan sa kinabuhi sila Jamie Lopez Cole, 63-anyos, taga Barangay Cabantian; ug Rocel Luna Haspe, 34-anyos, taga Purok 15 Green St. Spring Village, Barangay Maa, ning dakbayan.
Samtang samaron sab sila Teresita Pilapil Tangaro, 45-anyos, taga Piapi Boulevard, Michael Baldoman Maghuyop, 44-anyos, taga Barangay Mandug ug Mae Antoneth Anticamara, 20-anyos, taga Purok 11 Sto. Nino, Barangay 76-A Bucana.
Sa laing bahin, nunot sa pagbalik sa kapiskay sa merkado human sa panghitabo, gipaila-ila na sa Davao City Police Office ang bag-ong drop off points alang sa mga sakyanan nga mag-parking duol sa public market ug ingon man alang sab sa pag-pick up sa mga pasahero.
Gipahugtan na sab ang seguridad karon sa merkado aron dili na subling mahitabo ang susamang insidente.
